Niftakru f’Oliver Friggieri fil-Jum Nazzjonali ta’ Luttu

Illum qed jiġi osservat jum ta’ luttu nazzjonali minħabba li se jsir funeral mill-Istat tal-Professur Oliver Friggieri.

Magħruf u maħbub kemm bħala awtur kif ukoll bħala ħassieb u għalliem, il-Professur Friggieri għadda għexieren ta’ snin minn ħajtu jeduka lill-istudenti tiegħu bħala lettur fid-Dipartiment tal-Malti, fejn serva wkoll bħala Kap tad-Dipartiment u Professur tal-Letteratura.

F’isem il-Kulleġġ San Alwiġi u d-Dipartiment tal-Malti tal-Iskola Sekondarja, is-Sur Keith Scicluna jaqsam memorja personali magħna:

Meta kont qed nistudja fil-kors tal-Baċellerat tal-Edukazzjoni fl-Universita’ ta’ Malti bejn l-2008 u l-2012, kelli diversi lekċers mal-Professur Friggieri, ħafna minnhom dwar il-letteratura Maltija. Profs Friggieri kien jgħix għal-letteratura Maltija u l-imħabba tiegħu għaliha konna ngħixuha miegħu aħna l-istudenti tiegħu. Mhux darba jew tnejn li kien ikompli d-diskussjoni dwar dan b’mod privat, speċjalment magħna l-istudenti tal-B.Ed, meta kien jistieden xi wħud minna fl-uffiċċju tiegħu u kien jagħtina pariri ta’ kif għandna nwasslu l-letteratura lill-istudenti fil-klassi la darba nkunu għalliema. Żgur li kienu pariri li għadna ngħożżuhom u nipprattikawhom illum il-ġurnata fil-klassijiet tagħna . Memorja tiegħu huma wkoll id-diversi kotba li kien jgħaddilna u jiffirmalna b’xi messaġġ sempliċi iżda partikolari, li llum jiena ngħożż fil-librerija tiegħi.

Nagħlqu b’waħda mill-iżjed poeżiji famużi u sbieħ tiegħu: Jekk, magħrufa wkoll bħala l-poeżija tal-bus shelters

Jekk tifhem x’jgħidu l-kwiekeb
lill-qamar tul il-lej’,
jekk tagħraf minn fejn telaq
is-sħab, fejn sejjer, fej’,

jekk tirfes kull mogħdija
u tterraq kullimkien,
jekk tkellem lil kull ħlejqa
li tikber fil-ħolqien,

jekk togħdos fl-ibħra kollha
u tmiss qiegħ l-oċean,
jekk titla’ kull muntanja
u titfi kull vulkan,

jekk tifhem lil kull siġra
u tkellem lil kull fjur,
jekk torqod ma’ kull dudu
u tqum ma’ kull għasfur,

jekk tgħodd in-numri kollha
u taf kull alfabett,
jekk tħott kull teorema
u żżarma kull kunċett,

jekk togħxa b’kull tbissima
u tokrob b’kull uġigħ,
jekk toftoq il-kliem kollu
u ssib is-sens li fih,

jekk taf kif kien il-bidu
u kif se jkun it-tmiem,
jekk taf kull fuq, kull isfel,
kull wara, kull quddiem,

jekk taf għaliex kull għabex
iżelleġ kull żerniq,
jekk taf kemm hija twila,
kemm twila, twila t-triq,

jekk taf għaliex l-iżbalji,
u taf x’inhu perfett,
jekk taf għax serp jitkaxkar
u għax itir farfett,

jekk ittawwalt iżżejjed
fuq xifer il-ġibjun
tal-qalb biex issa ttella’
bis-satal x’hemm midfun,

jekk il-maltemp sikkittu
u lill-irjieħ raqqadt,
jekk l-ilmijiet nixxifthom
u lin-nirien qabbadt,

jekk fhimt kull mistoqsija
u jekk kull ħalfa ħlift,
u jekk kull rebħa rbaħtha
u jekk kull telfa tlift,

– il-petali tal-warda
waqgħulek minn idejk,
dan l-univers itektek
inqasam hemm, f’riġlejk.

Il-ħajja mistoqsija
miġbura f’elf għaliex,
u ssirlek poeżija
jekk int ma tweġibhiex.

Grazzi u strieħ fis-sliem, Prof Friggieri!